घोटाळा लपवण्यासाठीच राफेलची फाईल जाळली – अजित पवार

Views
Views:

पुणे ; राफेल खरेदी प्रकरणाची फाइल चोरीला गेल्याची माहिती सरकारतर्फे कोर्टात देण्यात आली आहे. मोदी सरकारकडून राफेल खरेदीमधील झालेला घोटाळा झाकण्यासाठी फाइल जाळली असावी,' असा आरोप अजित पवार यांनी मोदी सरकारवर केला.
हडपसर येथे राष्ट्रवादी काँग्रेसची संवाद यात्रा पवार यांच्या अध्यक्षतेखाली पार पडली. या वेळी दिलीप वळसे पाटील, अभिनेते अमोल कोल्हे, माजी मंत्री बाळासाहेब शिवरकर, माजी आमदार विलास लांडे, राष्ट्रवादी काँग्रेसचे शहराध्यक्ष चेतन तुपे, काँग्रेसचे शहराध्यक्ष रमेश बागवे यांच्यासह आजी-माजी पदाधिकारी उपस्थित होते. अजित पवार म्हणाले, 'पुलवामा घटनेचे सत्ताधारी भाजपकडून मोठ्या प्रमाणात राजकारण करण्यात येत आहे. त्यानंतर पाकिस्तानला जशाच तसे उत्तर वायूसेनेकडून देण्यात आले. सर्वांनी वायूसेनेचे अभिनंदन करायला हवे. या हल्ल्याचे श्रेयही भाजपने घेतले असून, ज्या दहशतवाद्यांना मारले, त्याबाबतची आकडेवारी वायूदलाने सांगितली नाही . मात्र, भाजपचे अध्यक्ष अमित शहा २५० जण मारल्याचे जाहीरपणे सांगत आहेत. त्यांना आकडेवारी सांगण्याचा अधिकार आहे का? असा सवाल अजित पवार यांनी उपस्थित केला. त्याचबरोबर पुलवामा येथे सैन्य दलाच्या ताफ्यात ती गाडी गेली कशी आणि आपली गुप्तचर यंत्रणा काय करीत होती,असा सवालही त्यांनी उपस्थित केला. 

Post a Comment

0 Comments